मिळालेल्या माहितीनुसार, बोदवड तालुक्यातील जामठी येथे शनिवारी पहाटेच्या सुमारास अज्ञात चोरट्यांनी बस स्थानकावरील पाच दुकाने फोडत चोरी केल्याचे निष्पन्न झालं आहे. यात बस थांब्याजवळील अमोल प्रोव्हीजन या किराणा दुकानातील १४ हजार रुपये रोख रक्कम आणि ५ हजार रुपये किमतीचे सीसीटीव्हीचे डीव्हीआर व सुकामेवा चोरट्यांनी लंपास केलेला असल्याची माहिती किराणा दुकान मालक काशिनाथ गुलाबचंद तेली यांनी फिर्यादीत दिलेली आहे. तर या दुकानासमोरील महाजन कृषी केंद्र येथील २१ हजार ६०० रुपये रोख रक्कम चोरट्यांनी लंपास केल्याची फिर्याद कुणाल भगवान महाजन यांनी दिलेली आहे.
साई राणा कृषी केंद्रातील सुमारे ५ हजार रुपये रोख रक्कम आणि ५ हजार रुपये किमतीचा सीसीटीव्ही डीव्हीआर चोरट्यांनी लंपास केल्याचं कृषी केंद्र चालक सुरेंद्र उमरावसिंग पाटील यांनी फिर्यादीमध्ये माहिती दिलेली आहे. तसेच ग्राहक सेवा केंद्रातील संदीप विठ्ठल महाजन यांच्या मालकीच्या दुकानातून ८ हजार रुपये रोख रक्कम व ५ हजार रक्कमेचा सीसीटीव्हीटी डीव्हीआर चोरट्यांनी लंपास केला आहे. येथीलच सद्गुरू जनरल स्टोअरमध्ये चोरट्यांनी २ हजार ५०० रुपये रोख आणि ७ हजार ५०० रुपये किंमतीच्या वायर तथा कॉस्मेटिक पावडर व इतर साहित्य चोरट्याने लंपास केलेले आहे.
सर्व ठिकाणचे डीव्हीआर चोरून नेले
चोरीचं बिंग फुटू नये, याकरता चोरट्यांनी सर्व ठिकाणच्या डीव्हीआर चोरी करून नेले आहे. याबाबत माहिती मिळताच घटनास्थळी पोलीस निरीक्षक राजेंद्र गुंजाळ यांनी पाहणी केली. जळगाव येथील श्वान पथकालाही प्राचारण करण्यात आले होते. जंजीर नावाच्या श्वानाने प्रत्येक दुकानात जाऊन चोरट्यांचा माग काढण्याचा प्रयत्न केला.
दरम्यान, या प्रकरणी बोदवड पोलीस स्थानकात अज्ञात चोरट्यांविरोधात गुन्हा दाखल करण्यात आलेला आहे. अधिक तपास पोलीस निरीक्षक राजेंद्र गुंजाळ यांच्या मार्गदर्शनाखाली सुधाकर शेजोळे करत आहेत.