Pune Rain Update: पुणे शहरासह जिल्ह्यातील ग्रामीण भागातही सोमवारी रात्री मुसळधार पाऊस कोसळला. पुण्यातील नारायण पेठ, सदाशिव पेठ, स्वारगेट, नवी पेठ यासह कात्रज, कोंढवा, कर्वेनगर या उपनगरात जोरदार पाऊस झाला. मुसळधार पावसाने पुण्यातील अनेक भागात पाणी साचले. आज सकाळी पावसाचा जोर ओसरला असला तरी आज संध्याकाळी पुण्यात पुन्हा एकदा मुसळधार पाऊस कोसळण्याचा अंदाज आहे.
हायलाइट्स:
- आज दुपारनंतर पुन्हा मुसळधार पावसाचा अंदाज हवामान विभागाने वर्तविला आहे
- प्रशासन सकाळपासूनच सतर्क मोडवर असल्याचे पाहायला मिळत आहे
येवलेवाडी ( स्मशानभूमीजवळ ), सुखसागर नगर (अंबामाता मंदिर), कोंढवा खुर्द ( एनआयबीएम रोड ), रास्ता पेठ, ( दारुवाला पुलाजवळ ), सुखसागर नगर (डॉल्फिन चौक), बी टी कवडे रोड (अग्निशमन केंद्र), हडपसर (गाडीतळ), शिवाजीनगर (पोलिस मुख्यालय), मंगळवार पेठ (शिवाजी स्टेडियम ), कसबा पेठ (फिश मार्केट जवळ) कुंभार वाडा समोर, नारायण पेठ (मोदी गणपती), औंध (डिएव्ही स्कुल गल्ली), कसबा पेठ (पवळे चौक), कसबा पेठ (भुतडा निवास), पर्वती (मिञमंडळ चौक) या ठिकाणी मोठ्या प्रमाणात पाणी साचले होते. अग्निशामक दल आणि महापालिका प्रशासनाच्या शर्थीच्या प्रयत्नांनंतर त्याठिकाणची परिस्थिती सध्या पूर्ववत झाली आहे.
दुसरीकडे पर्वती येथील रमणा गणपतीजवळ भिंतीचा काही भाग पडल्याची घटना देखील घडली होती. तर, हडपसर, ( आकाशवाणी जवळ ), चंदननगर (बिडी कामगार वसाहत) या ठिकाणी झाडपाडीच्या घटना घडल्या. पाषाण येथील लोयला स्कुलजवळ एका दुचाकीवर झाड पडले होते. यात एक दुचाकीस्वार जखमी झाला असून त्याला तातडीने खासगी रुग्णालयात हलवण्यात आले.
काल पडलेल्या मुसळधार पावसात अग्निशामक दलाने एकूण १२ नागरिकांची सुखरूप सुटका केली. कोंढवा खुर्द भाजी मंडई येथे एका ठिकाणी पाण्यात अडकलेल्या सात नागरिकांना रश्शीच्या साह्याने बाहेर काढले. तर, मंगळवार पेठ येथील सदाआनंद नगर येथून किमान १५ ते २० फुट साचलेल्या पाण्यातून तीन लहान मुली एक महिला आणि एका पुरुषाला बाहेर काढण्याची कामगिरी अग्निशामक दलाकडून करण्यात आली.
जवळच्या शहरातील बातम्या
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.