सायबर गुन्हेगारीचे स्वरूप विकेंद्रित आणि विस्तारलेले असल्याने पोलिस एखाद्या प्रकरणाचा माग काढेपर्यंत सायबर चोरटे नागरिकांची फसवणूक करण्यासाठी नवनवीन क्लृप्ती लढवत असल्याचे दिसून येत आहे. भेटवस्तू, स्वस्तात दुचाकी, गृहोपयोगी वस्तू, ऑनलाइन टास्क, नोकरी, गुंतवणूक केल्यास परतावा, थकीत वीजशुल्क अशा विविध प्रकारच्या मेसेजनंतर सायबर चोरट्यांनी आता वाहनचालकांना ‘टार्गेट’ करण्यास सुरुवात केली आहे.
नियमभंग करणाऱ्या वाहनचालकांवरील थकीत दंडाचे प्रमाण मोठे असल्याने चोरट्यांनी वाहतूक नियमभंग दंडाचा बनावट मेसेज प्रसारित करण्यास सुरुवात केली आहे. वाहनचालकांना दंड ऑनलाइन भरता यावा, यासाठी वाहतूक विभागातर्फे https://echallan.parivahan.gov.in/ ही लिंक देण्यात आली आहे. त्यामध्ये फेरफार करून सायबर चोरट्यांनी https://echallan.parivahan.in/ ही लिंक तयार केली असून, ती प्रसारित करण्यात येत आहे. या बनावट लिंकवर क्लिक केल्यास फसवणूक होण्याची शक्यता आहे.
थकीत दंडाचा अधिकृत मेसेज पोलिसांकडून पाठविण्यात येतो. या मेसेजमध्ये छायाचित्र नसते. चोरट्यांनी बनावट मेसेज पाठवण्यास सुरुवात केली आहे. या लिंकमधील शब्दात फेरफार करण्यात आला आहे. नागरिकांनी अशा प्रकारच्या मेसेजना प्रतिसाद देऊ नये. अधिकृत लिंकद्वारे व्यवहार करावा, असे आवाहन वाहतूक शाखेचे पोलिस उपायुक्त विजयकुमार मगर यांनी केले आहे.
सायबर चोरटे वेगवेगळ्या प्रकारे फसवणूक करीत आहेत. वाहतूक दंडाचे मेसेज पाठवून फसवणूक करण्याचा नवीन मार्ग चोरट्यांनी अवलंबला आहे. नागरिकांनी लिंकची खात्री केल्याशिवाय पैसे भरू नये.
– मीनल सुपे-पाटील, वरिष्ठ पोलिस निरीक्षक, सायबर गुन्हे शाखा
सायबर चोरट्यांनी थकीत दंडाचा बनावट मेसेज प्रसारित केल्याचा प्रकार उघडकीस आला आहे. नागरिकांनी बनावट मेसेजला प्रतिसाद देऊ नये. लिंकची खात्री करूनच व्यवहार करावा. लिंकची माहिती सायबर गुन्हे शाखेला कळविण्यात आली आहे. त्यानुसार कारवाई करण्यात येत आहे. फसवणूक झाल्यास त्वरित पोलिसांकडे तक्रार द्यावी.
– विजयकुमार मगर, पोलिस उपायुक्त, वाहतूक शाखा
इकडे लक्ष द्या…
वाहन दंड भरण्यासाठी अधिकृत लिंक https://echallan.parivahan.gov.in/
बनावट लिंक https://echallan.parivahan.in/