pune murder stages as suicide, पुण्यात मित्राचा काटा काढला, चार तास घालून त्यानेच जीव दिल्याचं भासवलं, पण आरोपी सापडलाच – maharashtra crime news pune man takes life of friend stages as he took his own life

पुणे : पुण्यातील खुनाचे सत्र काही थांबण्याचं नाव घेत नाही. कोथरूड मध्ये देखील अशीच एक धक्कादायक घटना घडली आहे. अज्ञात कारणावरून तरुणाचा खून करण्यात आला. त्यानंतर त्याचा मृतदेह घरातील छताच्या पंख्याला लटकवून आत्महत्या भासवण्याचा धक्कादायक प्रकार घडला आहे. याप्रकरणी कोथरूड पोलिसांनी एकाला अटक केली आहे. विशेष म्हणजे आरोपी हा मयत तरुणाचा मित्रच असल्याचं समोर आलं आहे.

परेश शंकर कंधारे ( वय २८ वर्ष, रा. स्मिता हाईट्स, लोकमान्य कॉलनी परमहंस नगर , कोथरूड ) असं खून झालेल्या तरुणाचं नाव आहे. परेश एका कॉल सेंटरमध्ये काम करत होता.

या प्रकरणी कोथरूड पोलिसांनी वसंत अवसारे याच्यावर कलम ३०२, २०१ नुसार गुन्हा दाखल करून अटक केली आहे. यासंदर्भात मयत परेशचे मामेभाऊ कुंदन बापू अडसूळ ( वय ३६ वर्ष रा. सागर कॉलनी , कोथरूड) यांनी फिर्याद दिली होती.

पोलिसांनी दिलेल्या माहितीनुसार, मंगळवारी आरोपी वसंत आणि मयत परेश हे दारू पिण्यासाठी एकत्र बसले होते. त्यानंतर या दोघांमध्ये अज्ञात कारणावरून भांडण झालं. हे भांडण इतक्या टोकाला गेलं की आरोपी वसंतने परेशचा गळा दाबून त्याचा खून केला.

हेही वाचा : नेहा फोन उचलेना, मावशीने जावयाच्या भावाला पाठवलं, दार उघडताच दिसलं भयानक दृश्य

त्यानंतर हा खून वाटू नये आणि पुरावे नष्ट करण्याच्या हेतूने आरोपीने शालीच्या सहाय्याने परेशचा मृतदेह घरातील छताच्या पंख्याला लटकवला. हा सगळा प्रकार मंगळवारी पहाटे चार ते बुधवारी सकाळी आठ वाजताच्या दरम्यान घडला. पुढील तपास पोलीस उपनिरीक्षक के.एस राठोड करत आहेत.

पोस्टमॉर्टम रिपोर्टमध्ये गळा दाबून खून झाल्याचे समोर आले. ही आत्महत्या नसून हत्या असल्याचे सुचित झाले आहे. सखोल तपास केल्यानंतर आम्ही अवसारेला अटक केली, असे पोलिसांनी सांगितले.

हेही वाचा : एका कारणाने प्रियकर वैतागला, २७ वर्षीय प्रेयसीचा काटा काढला, पनवेलमधलं गूढ चपलेने उकललं