isha ambani twins, ईशा अंबानींच्या जुळ्या बाळांचं भारतात पाऊल, तब्बल ३०० किलो सोने दान करणार आणि… – mukesh ambani daughter isha ambani come back mumbai with twins from los angeles amrica

मुंबई : उद्योगपती अनिल अंबानी यांची कन्या इशा अंबानी आणि जावई आनंद पिरामल हे जोडपं जुळ्या बाळांसह अमेरिकेतल्या लॉसएंजेलिसहून भारतात दाखल झालंय. सकाळी साडे आठ वाजताच्या सुमारास कतार एअरलाईन्सच्या स्पेशल विमानाने मुंबई विमानतळाच्या व्हीआयपी गेट नंबर ८ वर त्यांचं आगमन झालं. त्यांच्या स्वागतासाठी जंगी तयारी करण्यात आलेली होती. इशा अंबानी यांचं निवासस्थान असलेल्या करुणासिंधू या निवासस्थानी देशभरातले शेकडो साधू संत आले होते. याप्रसंगी अंबानी कुटुंब तब्बल ३०० किलो सोने दान करणार आहे. त्यासोबतच अंबानी आणि पिरामल कुटुंबाकडून ५ अनाथाश्रम सुरु केले जाणार आहेत.

देशातील सर्वात आघाडीच्या उद्योजक घराण्यांपैकी एक असलेल्या अंबानी कुटुंबाला २० नोव्हेंबरला आनंदाची बातमी मिळाली होती. मुकेश अंबानी यांची कन्या ईशा अंबानी हिने जुळ्या मुलांना जन्म दिला. ईशा अंबानी हिचा विवाह पीरामल समूहाच्या आनंद पिरामल यांच्याशी झाला होता. या दाम्पत्याला मुलगा आणि मुलगी अशी जुळी मुलं झाल्याने अंबानी आणि पीरामल कुटुंबीयांमध्ये आनंदाचं वातावरण आहे. अंबानी कुटुंबीयांकडून या दोन्ही जुळ्या मुलांचे नामकरणही करण्यात आले. मुलाचे नाव कृष्णा आणि मुलीचे नाव आदिया ठेवण्यात आलं.

मुलांच्या स्वागताला, त्यांना आशीर्वाद देण्यासाठी वेगवेगळ्या मंदिरांच्या पुजाऱ्यांना, साधू संतांना बोलविण्यात आलं आहे. या निमित्ताने पूजा ठेवण्यात आलीये. पूजा संपन्न झाल्यावर महाप्रसादाचा कार्यक्रम ठेवण्यात आलाय. जेवणाचा स्वयंपाक करण्यासाठी जगभरातून वेगवेगळ्या केटरर्सना बोलावण्यात आले आहे. अंबानी कुटुंब त्यांच्या घरातील भव्य सोहळ्यात तिरुपती बालाजी, तिरुमला, श्रीनाथजी, नाथद्वारा आणि श्री द्वारकाधीश आणि इतर ठिकाणांसारख्या भारतातील मोठ्या मंदिरांमधून आलेला प्रसाद देणार आहेत.

मुंबईतील खास डॉक्टरांचे पथकही लॉस एंजेलिसला पोहोचलं होतं, अशी चर्चा आहे. या सर्वांनी आपल्या देखरेखीखाली ईशा आणि मुलांना मुंबईत आणले आहे. अमेरिकेतील सर्वोत्कृष्ट बालरोगतज्ञांपैकी एक असलेले डॉ. गिब्सन हे देखील डॉक्टरांच्या टीमसोबत होते. जुळ्या मुलांचे उड्डाण सुरक्षित आहे का? याची खात्री करणे हे त्यांचे काम होते. त्यासोबतच लॉस एंजिलिसहून अंबानी यांचे जवळचे मित्र त्यांच्या लेकीसोबत भारतात तिला सोडायला आले होते.

मुकेश अंबानींच्या कुटुंबात आता तीन तीन नातवंडे झाली आहेत. त्यांचा मुलगा-सून आकाश व श्लोकाला एक मुलगा आहे. त्याचे नाव पृथ्वी आहे. मुकेश अंबानी अनेकवेळा त्याच्यासोबत रमताना दिसून येतात. ईशा अंबानी आणि आनंद अंबानी यांचा १२ डिसेंबर २०१८ रोजी विवाह झाला होता. २३ वर्षांची असल्यापासून ईशा अंबानीने रिलायन्स समूहाच्या कारभारात लक्ष घालायला सुरुवात केली होती. ऑक्टोबर २०१४ मध्ये ईशा अंबानी यांची रिलायन्स रिटेल आणि रिलायन्स जिओच्या संचालक मंडळावर वर्णी लागली होती.