Girl Student Suicide teacher caught copying in exam chembur; शिक्षकाने कॉपी करताना पकडलं, मग आईला सांगितलं; नववीची विद्यार्थिनी घरी गेली अन् आक्रित घडलं…

मुंबई:शिक्षकांनी परीक्षेदरम्यान कॉपी करताना पकडल्याच्या नैराश्यातून एका १६ वर्षीय विद्यार्थिनीने आत्महत्या केल्याची धक्कादायक घटना समोर आली आहे. मुंबईतील चेंबूर परिसरात ही घटना घडली आहे. ही अल्पवयीन मुलगी नवव्या वर्गात शिकत होती. परीक्षेदरम्यान शिक्षकांनी तिला कॉपी करताना पकडलं. त्यानंतर या विद्यार्थिनीने थेट आपला जीव दिला. याप्रकरणी चेंबूर पोलिसांनी अकस्मात मृत्यूची नोंद करण्यात आली आहे.चेंबूरमध्ये राहणारी ही १६ वर्षीय अल्पवयीन मुलगी नवव्या वर्गात शिकते. सध्या शाळेत परीक्षा सुरु आहे. यावेळी पेपर देत असताना शिक्षकाने या अल्पवयीन मुलीला कॉपी करताना पकडलं. त्यानंतर शिक्षकाने तिच्या पालकांना बोलावलं. विद्यार्थिनीच्या आईला शिक्षकाने तिने पेपरमध्ये कॉपी केल्याची माहिती दिली. त्यानंतर या घटनेने विद्यार्थिनी नैराश्यात गेली.

एका रात्रीत वेटर झाला कोट्यधीश, तरी अजूनही करतो रेस्टॉरंटमध्ये काम, कारण वाचून कौतुक वाटेल
भरवर्गात आपण कॉपी करताना पकडले गेलो याची तिला लाज वाटली. त्यातच आईला शिक्षकांनी सारं काही सांगितल्याने तिला आणखी वाईट वाटू लागलं. यातून नैराश्यात जाऊन तिने इतका टोकाचा निर्णय घेतला. या प्रकरणानंतर ती शाळेतून घरी आली आणि तिने राहत्या घरी गळफास घेत आत्महत्या केली.

या घटनेची माहिती पोलिसांना देण्यात आली. त्यानंतर पोलिसांनी तात्काळ घटनास्थळी धाव घेतली. तेव्हा त्यांनी विद्यार्थिनी गळफास घेतलेल्या अवस्थेत आढळून आली. पोलिसांनी अल्पवयीन मुलीचा मृतदेह ताब्यात घेतला आणि शवविच्छेदनासाठी रुग्णालयात पाठवला. तसेच, याप्रकरणाची संपूर्ण माहिती घेऊन पोलिसांनी या प्रकरणी अकस्मात मृत्यूची नोंद केली आहे.

पोलीस भरतीत आयुष्याची शर्यत हरला; १६०० मीटर धावला, बेशुद्ध होऊन कोसळला, मग…
कॉपी करताना पकडल्या गेल्याच्या कारणातून आपल्या लेकीने इतकं टोकाचं पाऊल उचलल्याने तिच्या पालकांना मोठा धक्का बसला आहे. त्यांच्या डोळ्यातील पाणी थांबत नाहीये. या घटनेने संपूर्ण चेंबूर हळहळलं आहे.